رمضانكم كريم… اللهم اني صايم بس..

أتى رمضان مزرعة العبــاد*** لتطهير القلوب من الفساد
فأدي حقوقــه قولا وفعـــلا*** وزادك فاتخــذه للمعــاد
فمن زرع الحبوب وما سقاها*** تأوه نادما يوم الحصــاد

السلام عليكم…
مساكم الله بالخير و صبحكم الله بالخير
رمضان عليكم مبارك
نسأل الله أن يتمم علينا شهر الصيام برحمة و مغفرة وبعتق من النار…
التدوينة هذي كتبتها بأول يوم رمضان… لكني تكاسلت في تصميم صورة للتدوينة..
ثم خرجت لكم بهالتصميم بابسط ما يكون.. اعتذاراتي لكم عن التاخير…

اليوم هو الاثنين ١ رمضان ١٤٣٢
بيجيني واحد يقول و ليه البربرة التاريخ مكتوب فوق
باقوله بالفم المليان: اعقل لا تخليني اجيب عيد الأم فيك…. اللهم اني صايم بس

ابشركم اعزاءي زوار وزائرات مدونتي الطخمة
اني اليوم على السحور اكلت كبسة… والتي كانت بقدرة قادر… اول كبسة اكلها منذو اكثر من ٥ شهور
يممممم احلى عزيمة
المهم مع الحماس طفقت آكل <<<< تراه مسوي التدوينة عشان يقول ذالكلمة
عاد ومع كثر التطفق نسينا الوقت وفجأة الا والاتصال جاينا…. اشربوووااا موية بسررررعة وااااااع
وثانيتين الا والاذان يصدح به, في كل ابو مكان…
فما كان من مضيفنا الكريم الا ونقز داخل ويرجع لي ومعه ٨ علب موية
ويفتح ويشرب ويفتح ويشرب ويقول اشؤب بشؤعة ت يجوج
وبعد لحظات اكتشفت انه يقول اشرب بسرعة ترا يجوز
بس انه من العجلة فك الغطاء بفمه واشششفط
وما درى الا الغطاء ناشب جمب النخاع

و عاد درءا للفتن.. وللتاكد من عدم جرح الصيام… فاني لم اشؤب شي
والان الساعة تشير الى الحادية طعش صباحا (الا دقيقتين)
و الظاهر ان العطش بدا ياخذ مجراه خخخخ >>اموت عالامين انا

طبعا كما هو معروف ان هذا الشهر يكثر فيه الفيمتو والتانج
وتكثر فيه انواع الحلويات والاشياءات اللي تنوكل
و هذا طبعا انه شهر تكثر فيه الاختراعات
فتلقى الام الله يحفظها قاعده في المطبخ تلف سمبوسة…
وشوي الا يطيح على عجين السمبوسة عسل ولا شيرة
فتصبح في نكبة هي الام وتفكر في اختراع يعود عليها بالمنفعة ويؤدي الى عدم رمي اي شيء
فتحوس في المطبخ شوي
ثم تمسك علبة الفول السوداني وادهني وسط العجينة ولفي سمبوسة…
وتطلع الحصيلة سمبوسة ينصب عليها عسل وتتحضر على الفطور الاول*
يعني ما شاء الله في اقل من ساعة ظهر للكون اختراع جديد…

ولا انسى برضه ان هذا الشهر هو شهر تجنيد العاملات الجدد
وعشان الناس اللي ما عندهم اخوات فنقول وتجنيد العاملين الجدد
زي ما احنا عارفين ان الام كائن استقلالي في المطبخ..
فكثير من الامهات تلقاهم متشطحين في المطبخ لحالهم…
واي واحد يدخل و حتى ليبدي المساعدة
فان مصيره ان تنشب الطاوة في وجهه <<< مع احتمالية طيران اشياء اخرى في اتجاه
الدخيل لكن مع التدريب تصبح الطاوة هي الشيء الوحيد اللي يصك بالوجه
لكن… في خلال الشهر الكريم تصبح الام مجبورة تجيب اكبر العيال يساعدونها
ويمكن كل العيال بعد..
فتجد في شهر رمضان العجب العجاب….
عصير عليه ملح… بيتزا عليها خيار
قرون تيس مع الفاكهة..
وعاد فيه مؤثرات صوتية ناتجة عن صياح الام
و مؤثرات بصرية عبارة عن نار تولع في اطراف الثياب او على الارضية
فنصيحة مني لكم…
ان لا يفوتكم الحماس… ادخلوا وساعدوا امهاتكم
<<< يا امهات ترا ما سويت اعلان عالفاضي.. ادعولي بلا حركات

احم… احم…
ايام الذكريات الجميلة…
والتي كنت فيهاانا اقضي ايام التجنيد الخاصة بي…
لم يكن فيه الكثير من القروشة
او الخسارات مادية و الانسانية ناجمة عن محاولات قتلي
الا انني كنت شخص مليء بالاستلكاع
ومن المؤكد انك يوم بتلقط مقلب مني اذا كان في فطورك شيء من صنعي…

اذكر في احد الايام…
كنت اسوي سمبوسة مع امي الله يحفظها
وكان العجين صناعة منزلية
المهم… سوينا الكمية المطلوبة للفطور
وسوينا كم حبة زود عشان نعطيها للجيران
المهم واثناء القلي.. رجعت للعجين واسوي لي ذيك السمبوسة…
والتي كانت مكونة من العجين و داخلها عجين … واجدعها مع خوياتها
المهم وخلال الفطور قاعد اتخير الحبات زين عشان ما اطيح فيها
وتفاجأت ان محد اكلها… او بالاحرى ما كانت موجودة في الصحن…
اذن….
لاااا تقولووون لي انها راحت للجيران …
ياااارجاااال جعلها عليهم بالف عافية …

طبعا… انا ماكنت الوحيد اللي يسوي كذا
فاعرف واحد جمعني مع احد الفصول الدراسية
يقول لي انه في احد المرات انعدمت المراقبة عليه اثناء الطبخ
والادمي كان يسوي مهلبية لذا فانه وبكل حماس
بدأ يحط في كل صحن حبة زيتون
وكان من عائلته الكريمة ان قامت بما يلزم من تكفيخ
و بعد فترة معد دخلوه المطبخ ابدن…

طيب…
انا في هذه السنة…
اعتبر لاول مرة ابتعد عن اهلي خلال رمضان..
يعني مر علي ١٩ رمضان مع اهلي..
وهالسنة انا عزوبي في الرياض
يعني هالسنة لا مقالب… ولا حركات لكاعة
احس بالكآبة
لكني بحول الله انوي اطبخ في سكن الطلاب
وراح اشل اكلي معي واروح عند اي احد افطر معه…
يعني على الاقل لازم من مقلب واحد خلال هالشهر..
اللي عنده افكار يسدحها وله مني هدية

طيب وصلنا لقبل الاخير…
ادري ان طعم السمبوسة حلو…
وان رمضان بدون فيمتو ما يكمل..
لكن الله يرحم والديكم…
ما ابغى اشوف احد طامر علي بعد شهر الا ووزنه زايد عشرة كيلو…
اعقلوا والا قسمبلللااه…. <<< انت ما ودك تصوم؟؟؟

اهاا.. ووش اخر شيء اخلصنا بسرعة؟
اقول لا تنافخ انت وياه…
كيفي باتكلم بشويش<<< ماوده يكمل صيامه على خير…

الصومال….
نعرف كلنا ان اخواننا في الصومال الحين يمرون بجفاف شديد
ومجاعة قاتلة… ويحتاجون للمساعدة بشدة..
ارجوا من كل شخص انه يحاول انه يتبرع لهم ولو بالشيء اليسير
وترا ما فيه شيء اسمه ماعندي الا كذا وكذا… ما يمديها تسويلهم شيء….
يا اخواني… لحد يتصغر هالريال او القرش حتى اللي بيدك…
ترا ٩٠ ريال بامكانها تكفل عائلة كاملة بشكل كامل…
يتوفر لهم بهالتسعين اكل وشرب لمدة قريبة من الشهر..
فسووا خير في شهركم…
لو كل واحد اخذ من كل واحد يعرفه ١٠ ريال بيتوفر له مبلغ كبير…
واللي يبغى يتبرع
يدخل على هالرابط وبيلقى معلومات للتبرع من كافة دول الخليج
اضغط هنا
عالعموم…
مبروك عليكم الشهر مرة ثانية
و سرتني زيارتكم

__________
ملاحظة هااامة مررررة:
سمبوسة الفول السوداني جدا لذيذة…
جربتها شخصيا… جربوها يمكن تعجبكم..